ٹھیک ہے ان دنوں خود پر ذرا غصہ ہوں میں

ٹھیک ہے ان دنوں خود پر ذرا غصہ ہوں میں

پھر بھی اپنی سبھی حرکات کو تکتا ہوں میں

آنکھ کی میز پہ رکھا ہے مرا خواب سفر

اور بستر پہ شکن ڈال کے سویا ہوں میں

مصلحت ڈھونڈتے پھرتے ہو سبھی کاموں میں

تم کو بیمار نہیں لگتا تو اچھا ہوں میں

وقت وحشت مجھے پہچان نہیں پاتا کوئی

پھر بتاتا ہوں فلاں شخص کا بیٹا ہوں میں

تم جو چاہو تو مجھے پیڑ کا حصہ کر دو

ورنہ پیروں تلے روندا ہوا پتا ہوں میں

چند لمحوں کا دھواں عکس میں تبدیل ہوا

اور میں جھوم کے کہنے لگا دیکھا ہوں میں

سخت بیماری میں رکھتا ہوں خیال آپ اپنا

خود سے خود پوچھتا رہتا ہوں کہ کیسا ہوں میں

thik hai in dinon khud par zara ghussa hun main

phir bhi apni sabhi harkat ko takta hun main

ankh ki mez pe rakha hai mira khwab-e-safar

aur bistar pe shikan dal ke soya hun main

maslahat dhundte phirte ho sabhi kamon mein

tum ko bimar nahin lagta to achchha hun main

waqt wahshat mujhe pahchan nahin pata koi

phir batata hun fulan shakhs ka beta hun main

tum jo chaho to mujhe per ka hissa kar do

warna pairon tale ronida hua patta hun main

chand lamhon ka dhuan aks mein tabdil hua

aur main jhum ke kahne laga dekha hun main

sakht bimari mein rakhta hun khayal ap apna

khud se khud puchhta rahta hun ke kaisa hun main