پاؤں کا دھیان تو ہے راہ کا ڈر کوئی نہیں

پاؤں کا دھیان تو ہے راہ کا ڈر کوئی نہیں

مجھ کو لگتا ہے مرا زاد سفر کوئی نہیں

بعض اوقات تو میں خود پہ بہت چیختا ہوں

چیختا ہوں کہ ادھر جاؤ جدھر کوئی نہیں

سر پہ دیوار کا سایا بھی اداسی ہے مجھے

ظاہراً ایسی اداسی کا اثر کوئی نہیں

آخری بار مجھے کھینچ کے سینے سے لگا

اور پھر دیکھ مجھے موت کا ڈر کوئی نہیں

خودکشی کرتے سمے پوچھتا ہوں میرا عزیز

اور آواز سی آتی ہے تو مر، کوئی نہیں

بھری دنیا ہے سسکنے میں جھجک ہوگی تمہیں

یہ مرا دل ہے ادھر رو لو ادھر کوئی نہیں

ایک دن لوگ مجھے تخت نشیں دیکھیں گے

یا یہ دیکھیں گے مرا جسم ہے سر کوئی نہیں

اس کی ہجرت بڑا اعصاب شکن سانحہ تھی

شہر تو شہر ہے جنگل میں شجر کوئی نہیں

صبح سے رات کی مایوسی بھگانے کا سبب

کوئی تو ہوتا مرے دوست مگر کوئی نہیں

بے خیالی سی مجھے گود میں بھر لیتی ہے

در پہ دستک ہو تو کہہ دیتا ہوں گھر کوئی نہیں

paon ka dhyan to hai rah ka dar koi nahin

mujh ko lagta hai mira zad-e-safar koi nahin

baaz auqat to main khud pe bahut chikhta hun

chikhta hun ke idhar jao jidhar koi nahin

sar pe diwar ka saya bhi udasi hai mujhe

zahiran aisi udasi ka asar koi nahin

akhiri bar mujhe khinch ke sine se laga

aur phir dekh mujhe maut ka dar koi nahin

khudkushi karte samay puchhta hun mera aziz

aur awaz si ati hai to mar, koi nahin

bhari duniya hai sisakne mein jhijak hogi tumhen

ye mira dil hai idhar ro lo idhar koi nahin

ek din log mujhe takht nashin dekhenge

ya ye dekhenge mira jism hai sar koi nahin

us ki hijrat bara aasab shikan saneha thi

shahr to shahr hai jangal mein shajar koi nahin

subh se rat ki mayusi bhagane ka sabab

koi to hota mire dost magar koi nahin

be khayali si mujhe god mein bhar leti hai

dar pe dastak ho to kah deta hun ghar koi nahin