شیدا مجھے بنایا گیسوئے عنبریں کا

شیدا مجھے بنایا گیسوئے عنبریں کا

دل ہی مرا ہوا ہے لو سانپ آستیں کا

اس کو خیال آیا پھر اس بت حسیں کا

اللہ ہے نگہباں میرے دل حزیں کا

گو پاس وہ نہیں ہیں پر دیکھتا ہوں ہر دم

لیتا ہوں میں تصور سے کام دوربیں کا

حوروں کے ذکر پر میں آیا نہیں ہوں واعظ

مجھ کو خیال اس دم آیا ہے اک حسیں کا

کچھ اضطراب دل کا بے تابیٔ جگر کچھ

اس کو سنا دیا یوں قصہ کہیں کہیں کا

تجھ کو جو ہے مکرنا محشر میں میرے خوں سے

قاتل چھڑا لے پہلے دھبا تو آستیں کا

shaida mujhe banaya gesu-e-ambarin ka

dil hi mira hua hai lo sanp astin ka

us ko khayal aya phir us but-e-hasin ka

allah hai nigahban mere dil-e-hazin ka

go pas wo nahin hain par dekhta hun har dam

leta hun main tasawwur se kam durbin ka

huron ke zikr par main aya nahin hun waiz

mujh ko khayal is dam aya hai ik hasin ka

kuchh iztirab-e-dil ka be tabi-e-jigar kuchh

us ko suna diya yun qissa kahin kahin ka

tujh ko jo hai mukarna mahshar mein mere khun se

qatil chhura le pahle dhabba to astin ka