بتو کچھ حد بھی ہے جور و جفا کی

بتو کچھ حد بھی ہے جور و جفا کی

ہے آخر انتہا ہر ابتدا کی

جگہ کیا ہو ان آنکھوں میں حیا کی

بھری ہو جن میں شوخی انتہا کی

شب غم آنے میں کرتی ہے غمزے

ادا بھاتی نہیں مجھ کو قضا کی

مرا دل لے کے اب مجھ پر یہ ظلم آہ

دغا کی تو نے او ظالم دغا کی

مزا ہے مے کشی کا ابر میں آج

فلک پرچھائی ہے رحمت خدا کی

بتوں کی مہربانی کیا کرم کیا

عنایت چاہئے مجھ پر خدا کی

تجھے او بے وفا چاہا ہوئی چوک

تجھے دل نے دیا میں نے خطا کی

یہ کیوں اڑتا ہے چہرے کا مرے رنگ

ہوئی کس شوخ کو حاجت حنا کی

وہ لیں گے جان بھی واں لے کے اک دن

خبر تھی ابتدا میں انتہا کی

چلا دل کوچۂ گیسو کو جس دم

دعا کی پڑھ کے دم رد بلا کی

گئے تھے وہ جہاں ہم ڈھونڈھ لیتے

مدد ملتی جو ان کے نقش پا کی

دل مضطر کی کچھ حالت نہ پوچھو

تڑپ بجلی میں ہے آج انتہا کی

جب آتے ہیں چڑھا جاتے ہیں دو پھول

وہ تربت پر فہیمؔ مبتلا کی

buto kuchh had bhi hai jaur-o-jafa ki

hai akhir intiha har ibtida ki

jagah kya ho in ankhon mein haya ki

bhari ho jin mein shokhi intiha ki

shab-e-gham ane mein karti hai ghamze

ada bhati nahin mujh ko qaza ki

mira dil le ke ab mujh par ye zulm ah

dagha ki tu ne o zalim dagha ki

maza hai mai kashi ka abr mein aj

falak parchhai hai rahmat khuda ki

buton ki mehrbani kya karam kya

inayat chahiye mujh par khuda ki

tujhe o be wafa chaha hui chok

tujhe dil ne diya main ne khata ki

ye kyun urta hai chehre ka mire rang

hui kis shokh ko hajat hina ki

wo lenge jan bhi wan le ke ik din

khabar thi ibtida mein intiha ki

chala dil kucha-e-gesu ko jis dam

dua ki parh ke dam-e-rad bala ki

gae the wo jahan ham dhundh lete

madad milti jo un ke naqsh-e-pa ki

dil-e-muztar ki kuchh halat na puchho

tarap bijli mein hai aj intiha ki

jab ate hain charha jate hain do phul

wo turbat par fahim-e-mubtala ki