بن گئی دم پر یہاں ابروئے جاناں دیکھ کر

بن گئی دم پر یہاں ابروئے جاناں دیکھ کر

چونکتا ہوں رات پھر خواب پریشاں دیکھ کر

میں تو قائل ہو گیا ہوں ربط حسن و عشق کا

وہ بھی رو دیتے ہیں اکثر مجھ کو گریاں دیکھ کر

خاکساران محبت سے کوئی سیکھے ادب

جھک گئے سجدے میں نقش پا جاناں دیکھ کر

وہ ابھی پہلو میں ہیں یہ اشک باری کیا ضرور

کچھ ذرا موقع محل اے چشم گریاں دیکھ کر

خندۂ گل پر مجھے اب کس طرح رونا نہ آئے

ہنستے ہیں وہ باغ میں بلبل کو نالاں دیکھ کر

اس قدر جوش جنوں میں خواہش ایذا مجھے

تلوے کھجلانے لگے خار مغیلاں دیکھ کر

توبہ کرنے کو تو کر لی لیکن اس کو کیا کروں

ڈگمگا جاتی ہے نیت ابر باراں دیکھ کر

وقت بارش ابر میں بجلی چمکتی ہے ضرور

کیوں نہ ہنس دے وہ ستم گر مجھ کو گریاں دیکھ کر

ہم قیامت کو بھلا کب مانتے لیکن فہیمؔ

آج قائل ہو گئے رفتار جاناں دیکھ کر

ban gai dam par yahan abru-e-janan dekh kar

chaunkta hun rat phir khwab-e-pareshan dekh kar

main to qail ho gaya hun rabt-e-husn-o-ishq ka

wo bhi ro dete hain aksar mujh ko giryan dekh kar

khaksaran-e-mohabbat se koi sikhe adab

jhuk gae sajde mein naqsh-e-pa janan dekh kar

wo abhi pahlu mein hain ye ashk bari kya zarur

kuchh zara mauqaa mahal ai chashm-e-giryan dekh kar

khanda-e-gul par mujhe ab kis tarah rona na ae

hanste hain wo bagh mein bulbul ko nalan dekh kar

is qadar josh-e-junun mein khwahish iza mujhe

talwe khajlane lage khar-e-mughilan dekh kar

tauba karne ko to kar li lekin us ko kya karun

dagmaga jati hai niyyat abr-e-baran dekh kar

waqt-e-barish abr mein bijli chamakti hai zarur

kyun na hans de wo sitam gar mujh ko giryan dekh kar

ham qayamat ko bhala kab mante lekin fahim

aj qail ho gae raftar janan dekh kar