اے شیخ مجھ کو خواہش باغ ارم نہیں

اے شیخ مجھ کو خواہش باغ ارم نہیں

کوچہ بتوں کا میرے لیے اس سے کم نہیں

پہلی سی اس میں عادت جور و ستم نہیں

افسوس اب یہی ہے کہ اس وقت ہم نہیں

ہاں کوئے غیر میں ترے نقش قدم نہیں

تجھ پر مرا گمان خدا کی قسم نہیں

مجھ نیم جاں کے قتل میں تاخیر اس قدر

معلوم ہو گیا ترے خنجر میں دم نہیں

نالو تمہارے ہاتھ ہے فرقت میں اپنی شرم

دیکھیں تو آج چرخ نہیں ہے کہ ہم نہیں

آب بقا ہو مجھ کو پلاؤ جو آب تیغ

تم زہر بھی جو دو تو وہ امرت سے کم نہیں

کرتا ہے مجھ سے عہد وفا تو وہ بت مگر

مجھ کو کچھ اعتبار خدا کی قسم نہیں

ممکن نہیں کہیں ہو ٹھکانا فہیمؔ کا

تیری نگاہ لطف اگر اے صنم نہیں

ai shaikh mujh ko khwahish-e-bagh-e-iram nahin

kucha buton ka mere liye us se kam nahin

pahli si is mein adat-e-jaur-o-sitam nahin

afsos ab yahi hai ke is waqt ham nahin

han ku-e-ghair mein tire naqsh-e-qadam nahin

tujh par mira guman khuda ki qasam nahin

mujh nim jan ke qatl mein takhir is qadar

maalum ho gaya tire khanjar mein dam nahin

nalo tumhare hath hai furqat main apni sharm

dekhen to aj charkh nahin hai ke ham nahin

ab-e-baqa ho mujh ko pilao jo ab-e-tegh

tum zahr bhi jo do to wo amrit se kam nahin

karta hai mujh se ahd-e-wafa to wo but magar

mujh ko kuchh etibar khuda ki qasam nahin

mumkin nahin kahin ho thikana fahim ka

teri nigah-e-lutf agar ai sanam nahin