پیاسے چہروں پر لگتے ہیں خالی ہاتھ دعاؤں کے

پیاسے چہروں پر لگتے ہیں خالی ہاتھ دعاؤں کے

پھر بھی کون سمجھ سکتا ہے دکھ سوکھے دریاؤں کے

جتنی بار لکھا ہے میں نے تیرا نام درختوں پر

تجھ کو نام سے جانتے ہوں گے پنچھی میرے گاؤں کے

اپنی مرضی کرنے والے ان کی بات نہیں سنتے

ہم جیسوں پر چل جاتے ہیں سارے زور خداؤں کے

تیرے ہاتھ میں خود کو دے کر نادانی کر بیٹھا ہوں

دھوپ کی گود میں کب پلتے ہیں بیٹے ٹھنڈی چھاؤں کے

دانش نقویؔ دیکھ رہے ہیں حیرانی اور حسرت سے

اس کی اپنی دو جھیلیں ہیں ہم بندے صحراؤں کے

pyase chehron par lagte hain khali hath duaon ke

phir bhi kaun samajh sakta hai dukh sukhe dariyaon ke

jitni bar likha hai main ne tera nam darakhton par

tujh ko nam se jante honge panchhi mere gaon ke

apni marzi karne wale un ki bat nahin sunte

ham jaison par chal jate hain sare zor khudaon ke

tere hath mein khud ko de kar nadani kar baitha hun

dhup ki god mein kab palte hain bete thandi chhaon ke

danish naqwi dekh rahe hain hairani aur hasrat se

us ki apni do jhelen hain ham bande sahraon ke