جھوٹ کی پوشاک پر پیوند کاری کب تلک

جھوٹ کی پوشاک پر پیوند کاری کب تلک

ہم سے آخر یہ بتاؤ ہوشیاری کب تلک

صاحب کشکول کچھ عزت کی روزی کر تلاش

یوں اکٹھا تو کرے گا ریز گاری کب تلک

راز میں نے تم کو اپنا دے دیا کچھ سوچ کر

دیکھنا ہے رکھ سکو گے رازداری کب تلک

عجز کی تاکید کرتے ہو بہت تقریر میں

یہ بتاؤ ظالموں سے انکساری کب تلک

جعل سازی کی کٹوری اور دانے لوبھ کے

کہہ رہے ہیں کچھ پرندے اے شکاری کب تلک

اے ہوس خوروں مری معصوم آنکھوں کے لیے

خواب لاؤ گے سنہرے باری باری کب تلک

اب تو واجب جان لے تعلیم کو اے میری قوم

سوچ یوں بہکائیں گے جعلی پجاری کب تلک

ہم کو یہ غم ہی نہ لے ڈوبے کہیں خلاق خلق

بے ضمیروں پر رہے گی تاج داری کب تلک

وہ بھی اک انسان ہے بتلاؤ اے طاہر سعودؔ

خواہ مخواہ سنتا رہے آخر تمہاری کب تلک

jhut ki poshak par paiwand kari kab talak

ham se akhir ye batao hoshyari kab talak

sahab-e-kashkol kuchh izzat ki rozi kar talash

yun ikattha to karega rez gari kab talak

raz main ne tum ko apna de diya kuchh soch kar

dekhna hai rakh sakoge razdari kab talak

ijz ki takid karte ho bahut taqrir mein

ye batao zalimon se inkisari kab talak

jual sazi ki katori aur dane lobh ke

kah rahe hain kuchh parinde ai shikari kab talak

ai hawas khuron miri maasum ankhon ke liye

khwab laoge sunahre bari bari kab talak

ab to wajib jan le taalim ko ai meri qaum

soch yun bahkaenge jaali pujari kab talak

ham ko ye gham hi na le dube kahin khallaq khalq

be zamiron par rahegi taj dari kab talak

wo bhi ik insan hai batlao ai tahir suud

khwah makhwah sunta rahe akhir tumhari kab talak