میں نے لاکھ دیکھے ستم مگر یہ ترا ستم تو عجیب ہے

کبھی پاس ہو کے بھی دور ہے کبھی دور ہو کے قریب ہے

میں بگڑ گیا تری اک نظر سے وگرنہ مجھ کو تو دیکھ کر

یہ گلی کی عورتیں بولتیں اسے دیکھو کیسا نجیب ہے

تو ہو سامنے تو بھی بے خودی نہ ہو سامنے تو بھی دل جلے

مرے کس گنہ کی سزا یہ دی کہ طپیدگی ہی نصیب ہے

ترے سحر کا میں شکار ہو کے ترے قریب جو آ گیا

تو پتہ چلا یہ مجھے کہ تجھ سے جو دور ہے وہ لبیب ہے

یہ دعا بھی ہے کہ نہ وصل ہو یہ دعا بھی ہے کہ نہ ہجر ہو

مرے مرض دل کا سبب ہے تو مرے دل کا تو ہی طبیب ہے

کبھی بے رخ اتنا کہ خار ہو کبھی ملتفت تو نثار ہو

تری یہ ادا بھی حبیب ہے تری وہ ادا بھی حبیب ہے

یہ زمانہ اہل زمانہ سب مجھے بھول جائیں گلہ نہیں

تو نہ بھولنا کہ معاذؔ بھی ترے میکدے کا رقیب ہے