جب تجھ سے ملا ہوں تو تجھے یار کہا ہے

جب تجھ سے ملا ہوں تو تجھے یار کہا ہے

جب مل نہ سکا ہوں تو دل آزار کہا ہے

تو نور نظر جان جگر رشک قمر ہے

او روح تغزل تجھے گلنار کہا ہے

دیکھا جو تناسب ترے اعضائے بدن کا

ہر عضو کو گل خود تجھے گلزار کہا ہے

اب تک تری باتوں کی حلاوت نہیں جاتی

جو تو نے کہا میں نے وہ سو بار کہا ہے

پوچھی مری حاجت جو کسی نے شب یلدا

مشعل کی بجائے ترا رخسار کہا ہے

تصویریں مصور نے بنائیں تو بہت پر

سب نے تری تصویر کو شہکار کہا ہے

جب خوب ہوئی مدح ستاروں کی تو میں نے

سب کو ترے تلووں کا پرستار کہا ہے

جب مجھ سے ہوئی معنیٔ محراب کی پرسش

انگلی سے ترے ابروئے خم دار کہا ہے

دیکھا جو مگس نے ترے گلفام لبوں کو

خود کو گل و گلزار سے بیزار کہا ہے

آنکھیں رم آہو و طلسمات کا سنگم

عینا کے لقب کا تجھے حق دار کہا ہے

عائزؔ یہ ترا خواب مگر وائے ندامت

لوگوں نے اسے عشق کا اظہار کہا ہے

jab tujh se mila hun to tujhe yar kaha hai

jab mil na saka hun to dil azar kaha hai

tu nur-e-nazar jan-e-jigar rashk-e-qamar hai

o ruh taghazzul tujhe gulnar kaha hai

dekha jo tanasub tire aaza-e-badan ka

har uzw ko gul khud tujhe gulzar kaha hai

ab tak tiri baton ki halawat nahin jati

jo tu ne kaha main ne wo sau bar kaha hai

puchhi miri hajat jo kisi ne shab-e-yalda

mashal ki bajae tira rukhsar kaha hai

taswiren musawwir ne banaen to bahut par

sab ne tiri taswir ko shahkar kaha hai

jab khub hui madh sitaron ki to main ne

sab ko tire talwon ka parastar kaha hai

jab mujh se hui maani-e-mehrab ki pursish

ungli se tire abru-e-kham dar kaha hai

dekha jo magas ne tire gulfam labon ko

khud ko gul-o-gulzar se bezar kaha hai

ankhen ram-e-ahu-o-tilismat ka sangam

ena ke laqab ka tujhe haq dar kaha hai

aiz ye tira khwab magar wae nadamat

logon ne use ishq ka izhar kaha hai