قطار جگنوؤں کی روشنی لٹاتی رہی

قطار جگنوؤں کی روشنی لٹاتی رہی

میں رنگ گوندھ کے تتلی کے پر بناتی رہی

رکھا تھا سوئی کی ٹک ٹک پہ اک دھڑکتا دل

یہی تماشہ گھڑی ہاتھ کی دکھاتی رہی

میں چاندنی کی سہیلی وہ چاند بھائی مرا

تمام دن یہی آواز کان کھاتی رہی

گھسا پٹا کہیں کچھ انتظار روتا رہا

ہوا کو دیکھو کھڑی سیٹیاں بجاتی رہی

وہ تھاپ ڈھول کی کچھ اور تیز ہوتی گئی

خموشی بیٹھی مرے پاس گنگناتی رہی

وہ ایک لڑکا سا لپٹا ہوا چراغ کے ساتھ

دیا سلائی مری انگلیاں جلاتی رہی

فلک کی کھونٹی سے ٹانگا ہوا تھا ایک خیال

زمیں پہ بیٹھی تری بات مسکراتی رہی

میں برف باری میں نکلی تھی آگ سلگانے

وہ ننھی تتلی مرے پاؤں جب دباتی رہی

قریب لانے کی ترغیب دینے والے دیکھ

تری خوشی میں مری زندگی بھی جاتی رہی

qatar jugnuon ki raushni lutati rahi

main rang gundh ke titli ke par banati rahi

rakha tha soi ki tuk tuk pe ik dharakta dil

yahi tamasha ghari hath ki dikhati rahi

main chandni ki saheli wo chand bhai mira

tamam din yahi awaz kan khati rahi

ghisa pita kahin kuchh intizar rota raha

hawa ko dekho khari sitiyan bajati rahi

wo thap dhol ki kuchh aur tez hoti gai

khamoshi baithi mire pas gungunati rahi

wo ek larka sa lipta hua charagh ke sath

diya sulai miri ungliyan jalati rahi

falak ki khunti se tanga hua tha ek khayal

zamin pe baithi tiri bat muskurati rahi

main barf bari mein nikli thi ag sulagane

wo nanhi titli mire paon jab dabati rahi

qarib lane ki targhib dene wale dekh

tiri khushi mein miri zindagi bhi jati rahi