مجھ پہ ٹوٹی جو سیہ رات بتانے کی نہیں

مجھ پہ ٹوٹی جو سیہ رات بتانے کی نہیں

یعنی یہ گردش حالات بتانے کی نہیں

ہاں مرا حال بھی بالکل ہے تمہارے جیسا

مان لو بات کہ ہر بات بتانے کی نہیں

دل کی رگ رگ میں گھلی جائے حلاوت جس کی

ہائے وہ درد کی سوغات بتانے کی نہیں

دھوپ کے شہر میں میرے بھی کئی دن گزرے

سر پہ برسی تھی جو برسات بتانے کی نہیں

زندگی مست تھی تب اپنی فضاؤں میں مگن

کھیلی تھی وقت نے جو گھات بتانے کی نہیں

میں کہانی کو نئے لفظ و معانی دوں گی

خود پہ گزری ہوئی دن رات بتانے کی نہیں

وقت نے کی تھی رقم اس گھڑی اک عمدہ مثال

زندگی تھی جو ترے ساتھ بتانے کی نہیں

جانے انجانے میں کیا راز ہوئے ہیں افشا

یوں کھلی مجھ پہ مری ذات بتانے کی نہیں

ذکر میں لاؤں تو چھن جانے کا خدشہ ہے سحرؔ

آئی جو شے ہے مرے ہاتھ بتانے کی نہیں

mujh pe tuti jo siyah rat batane ki nahin

yaani ye gardish-e-halat batane ki nahin

han mira hal bhi bilkul hai tumhare jaisa

man lo bat ke har bat batane ki nahin

dil ki rag rag mein ghuli jae halawat jis ki

hae wo dard ki saughat batane ki nahin

dhup ke shahr mein mere bhi kai din guzre

sar pe barsi thi jo barsat batane ki nahin

zindagi mast thi tab apni fazaon mein magan

kheli thi waqt ne jo ghat batane ki nahin

main kahani ko nae lafz-o-maani dungi

khud pe guzri hui din rat batane ki nahin

waqt ne ki thi raqam us ghari ik umda misal

zindagi thi jo tire sath batane ki nahin

jane anjane mein kya raz hue hain ifsha

yun khuli mujh pe miri zat batane ki nahin

zikr mein laun to chhin jane ka khadsha hai sahar

ai jo shai hai mire hath batane ki nahin