مجھے اپنے ہی اندر چور سا محسوس ہوتا ہے

مجھے اپنے ہی اندر چور سا محسوس ہوتا ہے

تجھے دیکھوں تو کوئی دیکھتا محسوس ہوتا ہے

تحیر کا یہ عالم ہے کہ جس کو دیکھ کر گزریں

پلٹ کے دیکھیے تو دوسرا محسوس ہوتا ہے

میں اندر سے بہت خالی ہوں لیکن تم بھی سچے ہو

کہ میرا جسم باہر سے بھرا محسوس ہوتا ہے

مرے اندر کسی شے نے بہت ہلچل مچائی ہے

جہاں بھی بیٹھتا ہوں زلزلہ محسوس ہوتا ہے

مگر اک عمر لگتی ہے یہاں تک آنے میں صاحب

جہاں نقصان میں بھی فائدہ محسوس ہوتا ہے

نہ جانے عشق کی اب کون سی منزل پہ فائز ہوں

جہاں میں ہوں وہاں فیصلؔ خدا محسوس ہوتا ہے

mujhe apne hi andar chur sa mahsus hota hai

tujhe dekhun to koi dekhta mahsus hota hai

tahayyur ka ye alam hai ke jis ko dekh kar guzren

palat ke dekhiye to dusra mahsus hota hai

main andar se bahut khali hun lekin tum bhi sachche ho

ke mera jism bahar se bhara mahsus hota hai

mire andar kisi shai ne bahut halchal machai hai

jahan bhi baithta hun zalzala mahsus hota hai

magar ik umr lagti hai yahan tak ane mein sahab

jahan nuqsan mein bhi faida mahsus hota hai

na jane ishq ki ab kaun si manzil pe faiz hun

jahan mein hun wahan faisal khuda mahsus hota hai