جو تھامتے تھے مرا ہاتھ بوڑھے ہو گئے ہیں

جو تھامتے تھے مرا ہاتھ بوڑھے ہو گئے ہیں

تبھی تو میرے خیالات بوڑھے ہو گئے ہیں

اب اس سے بڑھ کے ہمیں اور آزمائے گا کیا

کہ چلتے چلتے ترے ساتھ بوڑھے ہو گئے ہیں

ہمارا بوجھ اٹھانے سے اب گریزاں ہیں

تمہارے ارض و سماوات بوڑھے ہو گئے ہیں

سفر مزید کریں گے تو گر پڑیں گے کہیں

کہ آتے جاتے یہ دن رات بوڑھے ہو گئے ہیں

جو میرے سر کی سفیدی پہ مسکراتے تھے

بس ایک رات رہے ساتھ بوڑھے ہو گئے ہیں

میں نسل نو کا اسے المیہ سمجھتا ہوں

شجر جواں ہیں مگر پات بوڑھے ہو گئے ہیں

تمہاری سمت سے اذن کلام ملتا نہیں

مرے لبوں پہ سوالات بوڑھے ہو گئے ہیں

jo thamte the mira hath burhe ho gae hain

tabhi to mere khayalat burhe ho gae hain

ab is se barh ke hamen aur azmaega kya

ke chalte chalte tire sath burhe ho gae hain

hamara bojh uthane se ab gurezan hain

tumhare arz-o-samawat burhe ho gae hain

safar mazid karenge to gar parenge kahin

ke ate jate ye din rat burhe ho gae hain

jo mere sar ki safedi pe muskurate the

bas ek rat rahe sath burhe ho gae hain

main nasl-e-nau ka use alamiyya samajhta hun

shajar jawan hain magar pat burhe ho gae hain

tumhari samt se izn-e-kalam milta nahin

mire labon pe sawalat burhe ho gae hain