سخت نا ہموار و مشکل تھا مگر ایسا نہ تھا

سخت نا ہموار و مشکل تھا مگر ایسا نہ تھا

میں نے جب راہیں تراشی تھیں سفر ایسا نہ تھا

کس زمانے کا حوالہ دے رہے ہو دوستو

آج سے پہلے تو جینے کا ہنر ایسا نہ تھا

شامل حالات اگر ہوتیں نہ کچھ خوش فہمیاں

میری قسمت میں بھٹکنا در بدر ایسا نہ تھا

مجھ سے کیوں منسوب ہو بیٹھیں وفا کی نعمتیں

میں تو اپنے واسطے بھی معتبر ایسا نہ تھا

میں کہاں ایسا کہ جھٹلاؤں تمہیں لیکن یہ ہے

میں نے جب دیکھا جہاں دیکھا بشر ایسا نہ تھا

آج تک بین السطور الجھی ہوئی تحریر ہوں

میں کہ پتھر تھا مگر پتھر نظر ایسا نہ تھا

میں نے کس بوتے پہ دی حیرتؔ صدا طوفان کو

میرے خوابوں کا شبستاں میرا گھر ایسا نہ تھا

sakht na hamwar-o-mushkil tha magar aisa na tha

main ne jab rahen tarashi thin safar aisa na tha

kis zamane ka hawala de rahe ho dosto

aj se pahle to jine ka hunar aisa na tha

shamil halat agar hotin na kuchh khush fahmiyan

meri qismat mein bhatakna dar badar aisa na tha

mujh se kyun mansub ho baithen wafa ki nematen

main to apne waste bhi motabar aisa na tha

main kahan aisa ke jhutlaun tumhen lekin ye hai

main ne jab dekha jahan dekha bashar aisa na tha

aj tak bain alssutur uljhi hui tahrir hun

main ke patthar tha magar patthar nazar aisa na tha

main ne kis bote pe di hairat sada tufan ko

mere khwabon ka shabistan mera ghar aisa na tha