کسی نشے سے بیشتر تو نہ تھا

کسی نشے سے بیشتر تو نہ تھا

رشتۂ غم بھی معتبر تو نہ تھا

میرے انجام انہیں فریب نہ دے

کم بصر تھا میں کم نظر تو نہ تھا

کم تو پہلے بھی تھے نہ اہل جنوں

لیکن اب تک جنوں ہنر تو نہ تھا

اپنی ہر خود سپردگی کی قسم

میں جہاں تھا وہ میرا گھر تو نہ تھا

ہم تھے راہیں تراشنے کے لئے

شامل اس فرض میں سفر تو نہ تھا

سائے لوگوں کے سر پہ کس نے کیے

دور تک ایک بھی شجر تو نہ تھا

خاک پر گر کے مٹ گیا آخر

اشک پھر اشک تھا گہر تو نہ تھا

وادیٔ مرگ کیوں عدم ٹھہری

زندگی سے وہاں مفر تو نہ تھا

وقت کی بات ہے میاں حیرتؔ

دل لگانے میں ایسا ڈر تو نہ تھا

kisi nashe se beshtar to na tha

rishta-e-gham bhi motabar to na tha

mere anjam unhen fareb na de

kam basar tha main kam nazar to na tha

kam to pahle bhi the na ahl-e-junun

lekin ab tak junun hunar to na tha

apni har khud supurdagi ki qasam

main jahan tha wo mera ghar to na tha

ham the rahen tarashne ke liye

shamil is farz mein safar to na tha

sae logon ke sar pe kis ne kiye

dur tak ek bhi shajar to na tha

khak par gir ke mit gaya akhir

ashk phir ashk tha guhar to na tha

wadi-e-marg kyun adam thahri

zindagi se wahan mafar to na tha

waqt ki bat hai miyan hairat

dil lagane mein aisa dar to na tha