خود ہی اپنا راز خود ہی راز داں بن جاؤں گا

خود ہی اپنا راز خود ہی راز داں بن جاؤں گا

ایک لمحے کا یقیں ہوں پھر گماں بن جاؤں گا

حرف کی صورت زباں پر ایک بار آنے تو دو

دیکھتے ہی دیکھتے میں داستاں بن جاؤں گا

ابتدا میں اک علامت تھا گزرتے وقت کی

انتہا تک اگلے وقتوں کا نشاں بن جاؤں گا

جب تراشا جا رہا تھا ذہن میں میرا بدن

کس نے سوچا تھا کہ میں سونا مکاں بن جاؤں گا

ہوتے ہوتے وہم میں تحلیل ہو جاؤ گے تم

اور میں بھی ایک سعیٔ رائیگاں بن جاؤں گا

حیرتؔ ایسا ہی مشیت کا ہے شاید قاعدہ

جھلملاتی لو سے ابھرا ہوں دھواں بن جاؤں گا

khud hi apna raz khud hi raz dan ban jaunga

ek lamhe ka yaqin hun phir guman ban jaunga

harf ki surat zaban par ek bar ane to do

dekhte hi dekhte mein dastan ban jaunga

ibtida mein ik alamat tha guzarte waqt ki

intiha tak agle waqton ka nishan ban jaunga

jab tarasha ja raha tha zehn mein mera badan

kis ne socha tha ke main sona makan ban jaunga

hote hote wahm mein tahlil ho jaoge tum

aur main bhi ek sai-e-raigan ban jaunga

hairat aisa hi mashiyyat ka hai shayad qaida

jhilmilati lau se ubhra hun dhuan ban jaunga