کرشمہ کیا نہ ہوا بات کون سی نہ ہوئی

کرشمہ کیا نہ ہوا بات کون سی نہ ہوئی

مگر چراغ تلے روشنی کبھی نہ ہوئی

کوئی بھی چول تو سیدھی نہیں ملی اس کی

ترا مزاج ہوا بیسویں صدی نہ ہوئی

وہ پیاس تھی کہ ہم اپنا لہو بھی پی جاتے

یہ اتفاق تھا اس سمت فکر ہی نہ ہوئی

جو کام ہاتھ میں ہم نے لیا سرے نہ چڑھا

جو بات سوچ کے تم ہنس دیے کبھی نہ ہوئی

سلام شوق ہر اک رات کی زبان پہ تھا

شریک حال مگر کوئی رات بھی نہ ہوئی

نگل گیا اسے میرا مزاج تیرہ شبی

وہ چاند ہی تھا مگر اس سے چاندنی نہ ہوئی

اس آخری تگ و دو کا بھی حشر دیکھ لیا

خوشی سے مل کے بھی حیرتؔ کوئی خوشی نہ ہوئی

karishma kya na hua bat kaun si na hui

magar charagh tale raushni kabhi na hui

koi bhi chul to sidhi nahin mili us ki

tira mizaj hua beswen sadi na hui

wo pyas thi ke ham apna lahu bhi pi jate

ye ittifaq tha us samt fikr hi na hui

jo kam hath mein ham ne liya sire na charha

jo bat soch ke tum hans diye kabhi na hui

salam-e-shauq har ik rat ki zaban pe tha

sharik-e-hal magar koi rat bhi na hui

nigal gaya use mera mizaj tira shabi

wo chand hi tha magar us se chandni na hui

is akhiri tag-o-do ka bhi hashr dekh liya

khushi se mil ke bhi hairat koi khushi na hui