اک فاختہ یہ پوچھ رہی ہے ہواؤں سے

اک فاختہ یہ پوچھ رہی ہے ہواؤں سے

کب تک چلے گا کام تمہاری دعاؤں سے

موتی لٹا رہے ہیں ستارے اداؤں سے

خیرات ضو کی لائے ہیں سورج کے گاؤں سے

اے انتہائے شوق ذرا صبر کر ابھی

الجھا ہوا ہے ذہن ابھی ابتداؤں سے

اے تیرگی کے سانپ مرے دل پہ لوٹ جا

تیرا ہی ذکر خیر تھا دھندلی فضاؤں سے

دی ہیں جو آہ نیم شبی نے بصیرتیں

کافور ہو نہ جائیں سحر کی دعاؤں سے

ننھا سا اک فرشتہ کھڑا دیکھتا رہا

کچھ کہہ رہا تھا آدمی برگد کی چھاؤں سے

شب بھر بھنبھوڑتا رہا کتا قیاس کا

ایسی بھی دل لگی نہ کیا کر گداؤں سے

حیرتؔ یہ اعتقاد کا اندھا کنواں نہیں

بچ کر نکل شعور کی جلتی چتاؤں سے

ik fakhta ye puchh rahi hai hawaon se

kab tak chalega kam tumhari duaon se

moti luta rahe hain sitare adaon se

khairat zau ki lae hain suraj ke gaon se

ai intiha-e-shauq zara sabr kar abhi

uljha hua hai zehn abhi ibtidaon se

ai tirgi ke sanp mire dil pe laut ja

tera hi zikr-e-khair tha dhundli fazaon se

di hain jo ah-e-nim shabi ne basiraten

kafur ho na jaen sahar ki duaon se

nanha sa ik farishta khara dekhta raha

kuchh kah raha tha admi bargad ki chhaon se

shab bhar bhambhurta raha kutta qayas ka

aisi bhi dil lagi na kiya kar gadaon se

hairat ye etiqad ka andha kuan nahin

bach kar nikal shuur ki jalti chitaon se