آنکھ میں آنسو نظر میں درد پیدا کر گیا

آنکھ میں آنسو نظر میں درد پیدا کر گیا

میرا ہنسنے کا ارادہ کیا غضب ڈھا کر گیا

میں نے برساتوں میں جلتے گھر کبھی دیکھے نہ تھے

میں اسی باعث ترے غم کو گوارا کر گیا

میری کوشش تھی مقدر کو نئی جہتیں ملیں

اور اسی کوشش میں خود کو بے سر و پا کر گیا

خوش یقینی بھی کھلا دیتی ہے کیسے کیسے گل

ایک دن واللہ میں خود پر بھروسا کر گیا

بات اصولوں کی نہیں ہے بات کچھ قدروں کی ہے

خواب جھوٹے تھے مگر میں ان کو سچا کر گیا

بس یہی صورت چھپانے کی انہیں نکلی کہ میں

ہر کسی کے سامنے زخموں کو ننگا کر گیا

مدتوں میری حیات امید کا محور رہی

پھر کوئی شخص آ کے حیرتؔ سب کچھ الٹا کر گیا

ankh mein ansu nazar mein dard paida kar gaya

mera hansne ka irada kya ghazab dha kar gaya

main ne barsaton mein jalte ghar kabhi dekhe na the

main isi bais tire gham ko gawara kar gaya

meri koshish thi muqaddar ko nai jihaten milen

aur isi koshish mein khud ko be sar-o-pa kar gaya

khush yaqini bhi khula deti hai kaise kaise gul

ek din wallah mein khud par bharosa kar gaya

bat usulon ki nahin hai bat kuchh qadron ki hai

khwab jhute the magar main un ko sachcha kar gaya

bas yahi surat chhupane ki unhen nikli ke main

har kisi ke samne zakhmon ko nanga kar gaya

muddaton meri hayat ummid ka mehwar rahi

phir koi shakhs a ke hairat sab kuchh ulta kar gaya