ایک مدت سے سر بام وہ آیا بھی نہیں

ایک مدت سے سر بام وہ آیا بھی نہیں

ہم کو اب حسرت دیدار تمنا بھی نہیں

جادۂ شوق میں تنہا بھی ہوں تنہا بھی نہیں

کیا حسیں بات ہے رسوا بھی ہوں رسوا بھی نہیں

تم جو ناراض ہوئے ہو گئی دنیا برہم

اب تو گرتی ہوئی دیوار کا سایہ بھی نہیں

کس کو میں دوت کہوں کس کو میں دشمن جانوں

سبھی اپنے ہیں یہاں کوئی پرایا بھی نہیں

آج تک بھی میں پرستش تو کئے جاتا ہوں

یہ الگ بات کہ میں نے تمہیں دیکھا بھی نہیں

صبح کی شمعیں لئے پھرتے ہو کیوں دیوانو

رشتۂ شب تو ابھی خیر سے ٹوٹا بھی نہیں

تو تخیل کے دریچے میں تھا کھویا کھویا

پیکر حسن تجھے میں نے جگایا بھی نہیں

کس طرح غم کو میں تقسیم کروں گا یارو

قصۂ درد کو حالات نے سمجھا بھی نہیں

کب تلک چلنا پڑے گا ہمیں تنہا تنہا

اب کسی موڑ پہ مل جائیں گے ایسا بھی نہیں

روبرو ان کے مرے ہونٹ نہ کھلنے پائے

دل کو اظہار تمنا کا سہارا بھی نہیں

جانے کیا سوچ کے اس نے مجھے دیوانہ کہا

ہائے اس کو ابھی محفل پہ بھروسہ بھی نہیں

رابطے جوڑنے نکلا تھا میں انساں کے خیالؔ

کسی انساں نے مجھے پیار سے دیکھا بھی نہیں

ek muddat se sar-e-bam wo aya bhi nahin

ham ko ab hasrat-e-didar-e-tamanna bhi nahin

jada-e-shauq mein tanha bhi hun tanha bhi nahin

kya hasin bat hai ruswa bhi hun ruswa bhi nahin

tum jo naraz hue ho gai duniya barham

ab to girti hui diwar ka saya bhi nahin

kis ko main dot kahun kis ko main dushman janun

sabhi apne hain yahan koi paraya bhi nahin

aj tak bhi main parastish to kiye jata hun

ye alag bat ke main ne tumhen dekha bhi nahin

subh ki shamen liye phirte ho kyun diwano

rishta-e-shab to abhi khair se tuta bhi nahin

tu takhayyul ke dariche mein tha khoya khoya

paikar-e-husn tujhe main ne jagaya bhi nahin

kis tarah gham ko main taqsim karunga yaro

qissa-e-dard ko halat ne samjha bhi nahin

kab talak chalna parega hamen tanha tanha

ab kisi mor pe mil jaenge aisa bhi nahin

rubaru un ke mire hont na khulne pae

dil ko izhar-e-tamanna ka sahara bhi nahin

jane kya soch ke us ne mujhe diwana kaha

hae us ko abhi mahfil pe bharosa bhi nahin

rabte jorne nikla tha main insan ke khayal

kisi insan ne mujhe pyar se dekha bhi nahin