کانچ کے شہر میں پتھر نہ اٹھاؤ یارو

کانچ کے شہر میں پتھر نہ اٹھاؤ یارو

مے کدہ ہے اسے مقتل نہ بناؤ یارو

صحن مقتل میں بھی مے خانہ سجاؤ یارو

شب کے سناٹے میں ہنگامہ مچاؤ یارو

زندگی بکنے چلی آئی ہے بازاروں میں

اس جنازے کے بھی کچھ دام لگاؤ یارو

جن کی شہ رگ کا لہو پھول کی انگڑائی تھا

ان کو اب حال گلستاں نہ بتاؤ یارو

پھیلتے سایۂ شب میں نہ چلو رک رک کے

بجھتی راہوں کو کف پا سے سجاؤ یارو

بزم یاراں میں وہ کچھ سوچ کے آیا ہوگا

ایسے دیوانے کو ٹھوکر نہ لگاؤ یارو

رات ڈھل جائے گی مے خانہ سنبھل جائے گا

کوئی نغمہ کوئی پیغام سناؤ یارو

زندگی رینگتی پھرتی ہے یہاں کاسہ بکف

اس کو اب وقت کا آئینہ دکھاؤ یارو

اب دھندلکوں میں بھی ہے تازہ اجالوں کا خیالؔ

شب کی دیوار سلیقے سے گراؤ یارو

kanch ke shahr mein patthar na uthao yaro

mai kada hai use maqtal na banao yaro

sehn-e-maqtal mein bhi mai khana sajao yaro

shab ke sannate mein hangama machao yaro

zindagi bikne chali ai hai bazaron mein

is janaze ke bhi kuchh dam lagao yaro

jin ki shah rag ka lahu phul ki angrai tha

un ko ab hal gulistan na batao yaro

phailte saya-e-shab mein na chalo ruk ruk ke

bujhti rahon ko kaf-e-pa se sajao yaro

bazm-e-yaran mein wo kuchh soch ke aya hoga

aise diwane ko thokar na lagao yaro

rat dhal jaegi mai khana sambhal jaega

koi naghma koi paigham sunao yaro

zindagi rengti phirti hai yahan kasa bakaf

us ko ab waqt ka aina dikhao yaro

ab dhundalkon mein bhi hai taza ujalon ka khayal

shab ki diwar saliqe se girao yaro