ہم نے صحرا کو سجایا تھا گلستاں کی طرح

ہم نے صحرا کو سجایا تھا گلستاں کی طرح

تم نے گلشن کو بنایا ہے بیاباں کی طرح

رات کا زہر پئے خواب کا آنچل اوڑھے

کون ہے ساتھ مرے گردش دوراں کی طرح

ڈھونڈھتا پھرتا ہوں اب تک بھی ہیں صحرا صحرا

اسی لمحے کو جو تھا فصل بہاراں کی طرح

مصلحت کوش زمانے کا بھروسہ کیا ہے

جو بھی ملتا ہے یہاں گردش دوراں کی طرح

آج وہ لمحے مجھے ڈستے ہیں تنہا پا کر

کبھی محبوب تھے جو مجھ کو دل و جاں کی طرح

جانے کیا بات ہے کیوں جشن مسرت میں ندیم

یاد آتی ہے تری شام غریباں کی طرح

کب تلک شہر کی گلیوں میں پھرو گے یارو

آسمانوں پہ اڑو تخت سلیماں کی طرح

یہ تو پروانوں کے دل ہیں جو پگھل جاتے ہیں

کون جلتا ہے یہاں شمع شبستاں کی طرح

کون خوابوں کے جزیرے سے چلا آیا خیالؔ

دل میں اک روشنی ہے صبح درخشاں کی طرح

ham ne sahra ko sajaya tha gulistan ki tarah

tum ne gulshan ko banaya hai bayaban ki tarah

rat ka zahr piye khwab ka anchal orhe

kaun hai sath mire gardish-e-dauran ki tarah

dhundhta phirta hun ab tak bhi hain sahra sahra

isi lamhe ko jo tha fasl-e-baharan ki tarah

maslahat kosh zamane ka bharosa kya hai

jo bhi milta hai yahan gardish-e-dauran ki tarah

aj wo lamhe mujhe daste hain tanha pa kar

kabhi mahbub the jo mujh ko dil-o-jan ki tarah

jane kya bat hai kyun jashn-e-masarrat mein nadim

yad ati hai tiri sham-e-ghariban ki tarah

kab talak shahr ki galiyon mein phiroge yaro

asmanon pe uro takht-e-sulaiman ki tarah

ye to parwanon ke dil hain jo pighal jate hain

kaun jalta hai yahan sham-e-shabistan ki tarah

kaun khwabon ke jazire se chala aya khayal

dil mein ik raushni hai subh-e-darakhshan ki tarah