جہاں میں ہوں وہاں حالات کا منظر نہیں بدلا

جہاں میں ہوں وہاں حالات کا منظر نہیں بدلا

وہی ہیں چاند تارے رات کا منظر نہیں بدلا

اسی انداز سے گرتی ہے بجلی آشیانے پر

ہوا گستاخ ہے برسات کا منظر نہیں بدلا

اگر بدلا ہے کچھ کچھ جسم و جاں کا روپ باہر سے

وہی ہے روح میری ذات کا منظر نہیں بدلا

ہزاروں لوگ اب بھی ہاتھ پھیلائے ہیں سڑکوں پر

ہمارے شہر میں خیرات کا منظر نہیں بدلا

کنولؔ اک مہرباں نے دی تھی جو مجھ کو محبت میں

خدا کا شکر اس سوغات کا منظر نہیں بدلا

jahan mein hun wahan halat ka manzar nahin badla

wahi hain chand tare rat ka manzar nahin badla

isi andaz se girti hai bijli ashiyane par

hawa gustakh hai barsat ka manzar nahin badla

agar badla hai kuchh kuchh jism-o-jan ka rup bahar se

wahi hai ruh meri zat ka manzar nahin badla

hazaron log ab bhi hath phailae hain sarkon par

hamare shahr mein khairat ka manzar nahin badla

kanwal ik mehrban ne di thi jo mujh ko mohabbat mein

khuda ka shukr is saughat ka manzar nahin badla