اجنبی رہ گزر کے تھے ہی نہیں

اجنبی رہ گزر کے تھے ہی نہیں

ہم جدھر تھے ادھر کے تھے ہی نہیں

چھوڑ کر اپنا گھر کہاں جاتے

ہم کسی اور گھر کے تھے ہی نہیں

کیسے آتے وہ ہم سفر واپس

جو ہمارے سفر کے تھے ہی نہیں

جو نہ آئے ہمارے دامن میں

پھل ہمارے شجر کے تھے ہی نہیں

وہ نظارے جو ہم سے دور رہے

وہ ہماری نظر کے تھے ہی نہیں

ساتھ چلتے کسی کے ہم کب تک

ہم پرائی ڈگر کے تھے ہی نہیں

چل دئے چھوڑ کر جو یار کنولؔ

وہ ہمارے نگر کے تھے ہی نہیں

ajnabi rah guzar ke the hi nahin

ham jidhar the idhar ke the hi nahin

chhor kar apna ghar kahan jate

ham kisi aur ghar ke the hi nahin

kaise ate wo ham safar wapas

jo hamare safar ke the hi nahin

jo na ae hamare daman mein

phal hamare shajar ke the hi nahin

wo nazare jo ham se dur rahe

wo hamari nazar ke the hi nahin

sath chalte kisi ke ham kab tak

ham parai dagar ke the hi nahin

chal diye chhor kar jo yar kanwal

wo hamare nagar ke the hi nahin