مجھ کو تعلیم سے نفرت ہی سہی

مجھ کو تعلیم سے نفرت ہی سہی

اور کھیلوں سے محبت ہی سہی

میں نے اس سے تو بڑے کام لیے

آپ کو کھیل سے وحشت ہی سہی

امتحاں سے میں نہیں گھبراتا

فیل ہونا مری قسمت ہی سہی

پڑھنے والوں نے بھی کیا کچھ نہ کیا

نقل کرنا مری عادت ہی سہی

میں نے تو صرف گزارش کی تھی

سب کی نظروں میں شکایت ہی سہی

میں کسی سے نہ لڑوں گا ہرگز

دب کے رہنا مری فطرت ہی سہی

میں نہ چھوڑوں گا شرافت کا چلن

یہ شرافت مری ذلت ہی سہی

کبھی چومے گی قدم خود منزل

آج ہر گام پہ دقت ہی سہی

یہ مصیبت بھی بڑی دل کش ہے

زندگی ایک مصیبت ہی سہی

کیفؔ اک دن یہ بنا دے گی تجھے

شعر گوئی تری عادت ہی سہی

mujh ko taalim se nafrat hi sahi

aur khelon se mohabbat hi sahi

main ne us se to bare kam liye

ap ko khel se wahshat hi sahi

imtihan se main nahin ghabrata

fel hona miri qismat hi sahi

parhne walon ne bhi kya kuchh na kiya

naql karna miri adat hi sahi

main ne to sirf guzarish ki thi

sab ki nazron mein shikayat hi sahi

main kisi se na larunga hargiz

dab ke rahna miri fitrat hi sahi

main na chhorunga sharafat ka chalan

ye sharafat miri zillat hi sahi

kabhi chumegi qadam khud manzil

aj har gam pe diqqat hi sahi

ye musibat bhi bari dil kash hai

zindagi ek musibat hi sahi

kaif ik din ye bana degi tujhe

sher goi tiri adat hi sahi