یہ پیلی شاخ پر بیٹھے ہوئے پیلے پرندے

یہ پیلی شاخ پر بیٹھے ہوئے پیلے پرندے

لرزتی دھوپ کی آغوش میں سہمے پرندے

خدا معلوم کس آواز کے پیاسے پرندے

وہ دیکھو خامشی کی جھیل میں اترے پرندے

مرے کمرے کی ویرانی سے اکتائے پرندے

سلگتی دوپہر میں کس طرف جاتے پرندے

حصار جسم سے گھبرا کے جب نکلے پرندے

ہوا کی زد میں آ کر دیر تک چیخے پرندے

خود اپنے شعلۂ پرواز سے جلتے پرندے

خلائے یخ زدہ میں رہ کے بھی سلگے پرندے

مرے دست ہوس آلود سے اڑتے پرندے

کسی شاخ جوانی تک نہیں پہنچے پرندے

ازل سے اک حسیں خوشبو کے دیوانے پرندے

ابد تک کیفؔ دشت رنگ میں بھٹکے پرندے

ye pili shakh par baithe hue pile parinde

larazti dhup ki aghosh mein sahme parinde

khuda maalum kis awaz ke pyase parinde

wo dekho khamushi ki jhil mein utre parinde

mire kamre ki wirani se uktae parinde

sulagti dopahar mein kis taraf jate parinde

hisar-e-jism se ghabra ke jab nikle parinde

hawa ki zad mein a kar der tak chikhe parinde

khud apne shola-e-parwaz se jalte parinde

khala-e-yakh zada mein rah ke bhi sulge parinde

mire dast-e-hawas alud se urte parinde

kisi shakh-e-jawani tak nahin pahunche parinde

azal se ik hasin khushbu ke diwane parinde

abad tak kaif-e-dasht-e-rang mein bhatke parinde