کیا جانے کتنے ہی رنگوں میں ڈوبی ہے

کیا جانے کتنے ہی رنگوں میں ڈوبی ہے

رنگ بدلتی دنیا میں جو یک رنگی ہے

منظر منظر ڈھلتا جاتا ہے پیلا پن

چہرہ چہرہ سبز اداسی پھیل رہی ہے

پیلی سانسیں بھوری آنکھیں سرخ نگاہیں

عنابی احساس طبیعت تاریخی ہے

دیکھ گلابی سناٹوں میں رہنے والے

آوازوں کی خاموشی کتنی کالی ہے

آج سفیدی بھی کالا ملبوس پہن کر

اپنی چمکتی رنگت کا ماتم کرتی ہے

ساری خبروں میں جیسے اک زہر بھرا ہے

آج اخباروں کی ہر سرخی نیلی ہے

کیفؔ کہاں تک تم خود کو بے داغ رکھو گے

اب تو ساری دنیا کے منہ پر سیاہی ہے

kya jane kitne hi rangon mein dubi hai

rang badalti duniya mein jo yak rangi hai

manzar manzar dhalta jata hai pila pan

chehra chehra sabz udasi phail rahi hai

pili sansen bhuri ankhen surkh nigahen

unnabi ehsas tabiat tarikhi hai

dekh gulabi sannaton mein rahne wale

awazon ki khamoshi kitni kali hai

aj safedi bhi kala malbus pahan kar

apni chamakti rangat ka matam karti hai

sari khabron mein jaise ik zahr bhara hai

aj akhbaron ki har surkhi nili hai

kaif kahan tak tum khud ko be dagh rakhoge

ab to sari duniya ke munh par siyahi hai