اپنے مرکز پہ نہ پورا ہوا چکر میرا

اپنے مرکز پہ نہ پورا ہوا چکر میرا

اجنبی ہاتھ بدلتے رہے محور میرا

میرے قالب کی شناسا نہیں ہیئت میری

اپنے سائے سے بھی بیزار ہے پیکر میرا

میرے سینے پہ تو دشمن کا کوئی زخم نہیں

میرے پہلو میں جو اترا ہے تو خنجر میرا

میں تو اب تک نہیں سیکھا ہوں زمیں پر چلنا

اور خلاؤں میں ہے چھایا ہوا شہ پر میرا

کس کو بخشا ہے خدایا مری قسمت لکھنا

کس کے ہاتھوں میں دیا تو نے مقدر میرا

میں وہ سلطاں ہوں کہ گھٹتی ہے ریاست جتنی

اتنا اتنا ہی بڑھا کرتا ہے لشکر میرا

بند غم ٹوٹنے والا ہے کسی دم پرتوؔ

ایسا لگتا ہے چھلکنے کو ہے ساغر میرا

apne markaz pe na pura hua chakkar mera

ajnabi hath badalte rahe mehwar mera

mere qalib ki shanasa nahin haiat meri

apne sae se bhi bezar hai paikar mera

mere sine pe to dushman ka koi zakhm nahin

mere pahlu mein jo utra hai to khanjar mera

main to ab tak nahin sikha hun zamin par chalna

aur khalaon mein hai chhaya hua shah par mera

kis ko bakhsha hai khudaya miri qismat likhna

kis ke hathon mein diya tu ne muqaddar mera

main wo sultan hun ke ghatti hai riyasat jitni

itna itna hi barha karta hai lashkar mera

band-e-gham tutne wala hai kisi dam partau

aisa lagta hai chhalakne ko hai saghar mera