یہ کالی گھٹا اٹھ کے مے خانوں کے سر آئی

یہ کالی گھٹا اٹھ کے مے خانوں کے سر آئی

گردش یہ زمانے کی پیمانوں کے سر آئی

گلشن پہ گری بجلی اور آگ لگی جس دم

یہ آگ جو پھیلی تو کاشانوں کے سر آئی

آتے ہی بہاروں کے پھر چاک ہوئے دامن

ہر صحرا نوردی یہ دیوانوں کے سر آئی

دے کر بھی وفا میں جاں الزام جفا آیا

رسوائی محبت میں نادانوں کے سر آئی

موجوں نے ڈبویا ہے ساحل پہ سفینے کو

قسمت کی برائی تھی طوفانوں کے سر آئی

اے رازؔ مجھے ملتی جو بھی تھی سزا ملتی

کیوں میری خطا سارے بیگانوں کے سر آئی

ye kali ghata uth ke mai khanon ke sar ai

gardish ye zamane ki paimanon ke sar ai

gulshan pe giri bijli aur ag lagi jis dam

ye ag jo phaili to kashanon ke sar ai

ate hi baharon ke phir chak hue daman

har sahra nawardi ye diwanon ke sar ai

de kar bhi wafa mein jan ilzam jafa aya

ruswai mohabbat mein nadanon ke sar ai

maujon ne duboya hai sahil pe safine ko

qismat ki burai thi tufanon ke sar ai

ai raz mujhe milti jo bhi thi saza milti

kyun meri khata sare beganon ke sar ai