اس دشت‌ ہلاکت سے گزر کون کرے گا

اس دشت‌ ہلاکت سے گزر کون کرے گا

بے امن خرابوں میں سفر کون کرے گا

خورشید جو ڈوبیں گے ابھرنے ہی سے پہلے

اس تیرگیٔ شب کی سحر کون کرے گا

چھن جائیں سر راہ جہاں چادریں سر کی

اس ظلم کی نگری میں بسر کون کرے گا

جس دور میں ہو بے ہنری وجہ سیادت

اس دور میں تشہیر ہنر کون کرے گا

اڑ جائیں گے جنگل کی طرف سارے پرندے

مینارۂ لرزاں پہ بسر کون کرے گا

اس خوف مسلسل میں گزر ہوگی تو کیوں کر

سولی پہ ہر اک رات بسر کون کرے گا

مژدہ مجھے جینے کا بھلا کس نے دیا تھا

مجھ کو مرے مرنے کی خبر کون کرے گا

is dasht-e-halakat se guzar kaun karega

be amn kharabon mein safar kaun karega

khurshid jo dubenge ubharne hi se pahle

is tirgi-e-shab ki sahar kaun karega

chhin jaen sar-e-rah jahan chadaren sar ki

is zulm ki nagri mein basar kaun karega

jis daur mein ho be hunari wajh-e-siyadat

is daur mein tashhir-e-hunar kaun karega

ur jaenge jangal ki taraf sare parinde

menarra-e-larzan pe basar kaun karega

is khauf musalsal mein guzar hogi to kyun kar

suli pe har ik rat basar kaun karega

muzhda mujhe jine ka bhala kis ne diya tha

mujh ko mire marne ki khabar kaun karega