کب وہ ظاہر ہوگا اور حیران کر دے گا مجھے

کب وہ ظاہر ہوگا اور حیران کر دے گا مجھے

جتنی بھی مشکل میں ہوں آسان کر دے گا مجھے

روبرو کر کے کبھی اپنے مہکتے سرخ ہونٹ

ایک دو پل کے لیے گلدان کر دے گا مجھے

روح پھونکے گا محبت کی مرے پیکر میں وہ

پھر وہ اپنے سامنے بے جان کر دے گا مجھے

خواہشوں کا خوں بہائے گا سر بازار شوق

اور مکمل بے سر و سامان کر دے گا مجھے

منہدم کر دے گا آ کر ساری تعمیرات دل

دیکھتے ہی دیکھتے ویران کر دے گا مجھے

ایک ناموجودگی رہ جائے گی چاروں طرف

رفتہ رفتہ اس قدر سنسان کر دے گا مجھے

یا تو مجھ سے وہ چھڑا دے گا غزل گوئی ظفرؔ

یا کسی دن صاحب دیوان کر دے گا مجھے

kab wo zahir hoga aur hairan kar dega mujhe

jitni bhi mushkil mein hun asan kar dega mujhe

rubaru kar ke kabhi apne mahakte surkh hont

ek do pal ke liye guldan kar dega mujhe

ruh phunkega mohabbat ki mire paikar mein wo

phir wo apne samne be jan kar dega mujhe

khwahishon ka khun bahaega sar-e-bazar-e-shauq

aur mukammal be sar-o-saman kar dega mujhe

munhadim kar dega a kar sari taamirat-e-dil

dekhte hi dekhte wiran kar dega mujhe

ek namaujudgi rah jaegi charon taraf

rafta rafta is qadar sunsan kar dega mujhe

ya to mujh se wo chhura dega ghazal goi zafar

ya kisi din sahab-e-diwan kar dega mujhe