کس نئے خواب میں رہتا ہوں ڈبویا ہوا میں

کس نئے خواب میں رہتا ہوں ڈبویا ہوا میں

ایک مدت ہوئی جاگا نہیں سویا ہوا میں

میری سورج سے ملاقات بھی ہو سکتی ہے

سوکھنے ڈال دیا جاؤں جو دھویا ہوا میں

مجھے باہر نہیں سامان کے اندر ڈھونڈو

مل بھی سکتا ہوں کسی شے میں سمویا ہوا میں

بازیابی کی توقع ہی کسی کو نہیں اب

اپنی دنیا میں ہوں اس طرح سے کھویا ہوا میں

شام کی آخری آہٹ پہ دہلتا ہوا دل

صبح کی پہلی ہواؤں میں بھگویا ہوا میں

آسماں پر کوئی کونپل سا نکل آؤں گا

سالہا سال سے اس خاک میں بویا ہوا میں

کبھی چاہوں بھی تو اب جا بھی کہاں سکتا ہوں

اس طرح سے ترے کانٹے میں پرویا ہوا میں

میرے کہنے کے لیے بات نئی تھی نہ کوئی

کہہ کے چپ ہو گئے سب لوگ تو گویا ہوا میں

مسکراتے ہوئے ملتا ہوں کسی سے جو ظفرؔ

صاف پہچان لیا جاتا ہوں رویا ہوا میں

kis nae khwab mein rahta hun duboya hawa mein

ek muddat hui jaga nahin soya hawa mein

meri suraj se mulaqat bhi ho sakti hai

sukhne dal diya jaun jo dhoya hawa mein

mujhe bahar nahin saman ke andar dhundo

mil bhi sakta hun kisi shai mein samwiya hawa mein

bazyabi ki tawaqqo hi kisi ko nahin ab

apni duniya mein hun is tarah se khoya hawa mein

sham ki akhiri ahat pe dahalta hua dil

subh ki pahli hawaon mein bhigoya hawa mein

asman par koi konpal sa nikal aunga

salha sal se is khak mein boya hawa mein

kabhi chahun bhi to ab ja bhi kahan sakta hun

is tarah se tire kante mein piroya hawa mein

mere kahne ke liye bat nai thi na koi

kah ke chup ho gae sab log to goya hawa mein

muskurate hue milta hun kisi se jo zafar

saf pahchan liya jata hun roya hawa mein