یوں بھی ہوتا ہے کہ یک دم کوئی اچھا لگ جائے

یوں بھی ہوتا ہے کہ یک دم کوئی اچھا لگ جائے

بات کچھ بھی نہ ہو اور دل میں تماشا لگ جائے

ہم سوالات کا حل سوچ رہے ہوں ابھی تک

اور ماتھے پہ محبت کا نتیجہ لگ جائے

ابھی دیوار اٹھائی بھی نہ ہو دل کی طرف

لیکن اس میں کوئی در کوئی دریچہ لگ جائے

کیا ستم ہے کہ وہی دور رہا ہو تم سے

اور اسی شخص پہ الزام تمہارا لگ جائے

پوری آواز سے اک روز پکاروں تجھ کو

اور پھر میری زباں پر ترا تالا لگ جائے

اور تو اس کے سوا کچھ نہیں امکان کہ اب

میرے دریا میں کہیں تیرا کنارہ لگ جائے

میں نے اور دل نے اسی باب میں سوچا ہے کہ ہم

کام کچھ بھی نہ کریں کوئی وظیفہ لگ جائے

کیا تماشا ہے کہ باقی ہو سمندر کا سفر

اور ساحل سے کسی روز سفینہ لگ جائے

یہ بھی ممکن ہے کہ اس کار گہہ دل میں ظفرؔ

کام کوئی کرے اور نام کسی کا لگ جائے

yun bhi hota hai ke yak dam koi achchha lag jae

bat kuchh bhi na ho aur dil mein tamasha lag jae

ham sawalat ka hal soch rahe hun abhi tak

aur mathe pe mohabbat ka natija lag jae

abhi diwar uthai bhi na ho dil ki taraf

lekin is mein koi dar koi daricha lag jae

kya sitam hai ke wahi dur raha ho tum se

aur usi shakhs pe ilzam tumhara lag jae

puri awaz se ik roz pukarun tujh ko

aur phir meri zaban par tira tala lag jae

aur to us ke siwa kuchh nahin imkan ke ab

mere dariya mein kahin tera kinara lag jae

main ne aur dil ne isi bab mein socha hai ke ham

kam kuchh bhi na karen koi wazifa lag jae

kya tamasha hai ke baqi ho samundar ka safar

aur sahil se kisi roz safina lag jae

ye bhi mumkin hai ke is kar gah dil mein zafar

kam koi kare aur nam kisi ka lag jae