ابھی آنکھیں کھلی ہیں اور کیا کیا دیکھنے کو

ابھی آنکھیں کھلی ہیں اور کیا کیا دیکھنے کو

مجھے پاگل کیا اس نے تماشا دیکھنے کو

وہ صورت دیکھ لی ہم نے تو پھر کچھ بھی نہ دیکھا

ابھی ورنہ پڑی تھی ایک دنیا دیکھنے کو

تمنا کی کسے پروا کہ سونے جاگنے میں

میسر ہیں بہت خواب تمنا دیکھنے کو

بہ ظاہر مطمئن میں بھی رہا اس انجمن میں

سبھی موجود تھے اور وہ بھی خوش تھا دیکھنے کو

اب اس کو دیکھ کر دل ہو گیا ہے اور بوجھل

ترستا تھا یہی دیکھو تو کتنا دیکھنے کو

اب اتنا حسن آنکھوں میں سمائے بھی تو کیونکر

وگرنہ آج اسے ہم نے بھی دیکھا دیکھنے کو

چھپایا ہاتھ سے چہرہ بھی اس نامہرباں نے

ہم آئے تھے ظفرؔ جس کا سراپا دیکھنے کو

abhi ankhen khuli hain aur kya kya dekhne ko

mujhe pagal kiya us ne tamasha dekhne ko

wo surat dekh li ham ne to phir kuchh bhi na dekha

abhi warna pari thi ek duniya dekhne ko

tamanna ki kise parwa ke sone jagne mein

muyassar hain bahut khwab-e-tamanna dekhne ko

ba zahir mutmain mein bhi raha is anjuman mein

sabhi maujud the aur wo bhi khush tha dekhne ko

ab us ko dekh kar dil ho gaya hai aur bojhal

tarasta tha yahi dekho to kitna dekhne ko

ab itna husn ankhon mein samae bhi to kyunkar

wagarna aj use ham ne bhi dekha dekhne ko

chhupaya hath se chehra bhi is namehrban ne

ham ae the zafar jis ka sarapa dekhne ko