وہ ایک طرح سے اقرار کرنے آیا تھا

وہ ایک طرح سے اقرار کرنے آیا تھا

جو اتنی دور سے انکار کرنے آیا تھا

خوشی جو خواب میں بھی میری دسترس سے تھی دور

مجھے اسی کا سزاوار کرنے آیا تھا

یہ صاف لگتا ہے جیسی کہ اس کی آنکھیں تھیں

وہ اصل میں مجھے بیمار کرنے آیا تھا

اگر تھا اس کو مری حیثیت کا اندازہ

تو کیوں وہ اپنا خریدار کرنے آیا تھا

یہ زندگی کہ جو آساں نہیں تھی پہلے بھی

اسے کچھ اور بھی دشوار کرنے آیا تھا

اگرچہ ایک ہی سست الوجود تھا لیکن

وہ کام کوئی لگاتار کرنے آیا تھا

مرے تو بس میں کوئی چیز تھی نہ پہلے بھی

وہ مجھ کو اور بھی لاچار کرنے آیا تھا

وہ ایک ابر گراں بار تھا مگر اس دن

ذرا فضا کو ہوا دار کرنے آیا تھا

عداوتوں میں وہاں دھر لیا گیا ہوں ظفرؔ

جہاں کے لوگوں سے میں پیار کرنے آیا تھا

wo ek tarah se iqrar karne aya tha

jo itni dur se inkar karne aya tha

khushi jo khwab mein bhi meri dastaras se thi dur

mujhe usi ka sazawar karne aya tha

ye saf lagta hai jaisi ke us ki ankhen thin

wo asl mein mujhe bimar karne aya tha

agar tha us ko miri haisiyyat ka andaza

to kyun wo apna kharidar karne aya tha

ye zindagi ke jo asan nahin thi pahle bhi

use kuchh aur bhi dushwar karne aya tha

agarche ek hi sust alwujud tha lekin

wo kam koi lagatar karne aya tha

mire to bas mein koi chiz thi na pahle bhi

wo mujh ko aur bhi lachar karne aya tha

wo ek abr-e-giran bar tha magar us din

zara faza ko hua dar karne aya tha

adawaton mein wahan dhar liya gaya hun zafar

jahan ke logon se main pyar karne aya tha