صرف آنکھیں تھیں ابھی ان میں اشارے نہیں تھے

صرف آنکھیں تھیں ابھی ان میں اشارے نہیں تھے

دل پہ موسم یہ محبت نے اتارے نہیں تھے

جیسی راتوں میں سفر ہم نے کیا تھا آغاز

سر بسر سمتیں ہی سمتیں تھیں ستارے نہیں تھے

اب تو ہر شخص کی خاطر ہوئی مطلوب ہمیں

ہم کسی کے بھی نہیں تھے جو تمہارے نہیں تھے

جب ہمیں کوئی توقع ہی نہیں تھی تم سے

ایسے اس وقت بھی حالات ہمارے نہیں تھے

مہلت عمر میں رہنے دیے اس نے شامل

جو شب و روز کبھی ہم نے گزارے نہیں تھے

جب نظارے تھے تو آنکھوں کو نہیں تھی پروا

اب انہی آنکھوں نے چاہا تو نظارے نہیں تھے

ڈوب ہی جانا مقدر تھا ہمارا کہ وہاں

جس طرف دیکھیے پانی تھا کنارے نہیں تھے

کیوں نہیں عشق بھلا ہر کس و نا کس کا شعار

اس تجارت میں اگر اتنے خسارے نہیں تھے

ٹھیک ہے کوئی مدد کو نہیں پہنچا لیکن

یہ بھی سچ ہے کہ ظفرؔ ہم بھی پکارے نہیں تھے

sirf ankhen thin abhi un mein ishare nahin the

dil pe mausam ye mohabbat ne utare nahin the

jaisi raton mein safar ham ne kiya tha aghaz

sar basar samten hi samten thin sitare nahin the

ab to har shakhs ki khatir hui matlub hamen

ham kisi ke bhi nahin the jo tumhare nahin the

jab hamen koi tawaqqo hi nahin thi tum se

aise is waqt bhi halat hamare nahin the

mohlat-e-umr mein rahne diye us ne shamil

jo shab-o-roz kabhi ham ne guzare nahin the

jab nazare the to ankhon ko nahin thi parwa

ab unhi ankhon ne chaha to nazare nahin the

dub hi jana muqaddar tha hamara ke wahan

jis taraf dekhiye pani tha kinare nahin the

kyun nahin ishq bhala har kis-o-na kis ka shiar

is tijarat mein agar itne khasare nahin the

thik hai koi madad ko nahin pahuncha lekin

ye bhi sach hai ke zafar ham bhi pukare nahin the