کھڑکیاں کس طرح کی ہیں اور در کیسا ہے وہ

کھڑکیاں کس طرح کی ہیں اور در کیسا ہے وہ

سوچتا ہوں جس میں وہ رہتا ہے گھر کیسا ہے وہ

کیسی وہ آب و ہوا ہے جس میں وہ لیتا ہے سانس

آتا جاتا ہے وہ جس پر رہ گزر کیسا ہے وہ

کون سی رنگت کے ہیں اس کے زمین و آسماں

چھاؤں ہے جس کی یہاں تک بھی شجر کیسا ہے وہ

اک نظر میں ہی نظر آ جائے گا وہ سر بسر

پھر بھی اس کو دیکھنا بار دگر کیسا ہے وہ

میں تو اس کے ایک اک لمحے کا رکھتا ہوں شمار

اور میرے حال دل سے بے خبر کیسا ہے وہ

اس کا ہونا ہی بہت ہے وہ کہیں ہے تو سہی

کیا سروکار اس سے ہے مجھ کو ظفرؔ کیسا ہے وہ

khirkiyan kis tarah ki hain aur dar kaisa hai wo

sochta hun jis mein wo rahta hai ghar kaisa hai wo

kaisi wo ab-o-hawa hai jis mein wo leta hai sans

ata jata hai wo jis par rah guzar kaisa hai wo

kaun si rangat ke hain us ke zamin-o-asman

chhaon hai jis ki yahan tak bhi shajar kaisa hai wo

ik nazar mein hi nazar a jaega wo sar basar

phir bhi us ko dekhna bar-e-digar kaisa hai wo

main to us ke ek ik lamhe ka rakhta hun shumar

aur mere hal-e-dil se be khabar kaisa hai wo

us ka hona hi bahut hai wo kahin hai to sahi

kya sarokar us se hai mujh ko zafar kaisa hai wo