کبھی اول نظر آنا کبھی آخر ہونا

کبھی اول نظر آنا کبھی آخر ہونا

اور وقفوں سے مرا غائب و حاضر ہونا

میں کسی اور زمانے کے لیے ہوں شاید

اس زمانے میں ہے مشکل مرا ظاہر ہونا

میں نہ ہونے پہ ہی خوش تھا مگر ایسے ہوا پھر

مجھ کو ناچار پڑا آپ کی خاطر ہونا

دور ہو جاؤں بھی اس باغ بدن سے لیکن

کہیں ممکن ہی نہیں ایسے مناظر ہونا

واقعی تم کو دکھائی ہی نہیں دیتا ہوں

یا ضرورت ہے تمہاری مرا منکر ہونا

راستہ آپ بنانا ہی کوئی سہل نہیں

پھر اسی راستے کا آپ مسافر ہونا

وہ مقامات مقدس وہ ترے گنبد و قوس

اور مرا ایسے نشانات کا زائر ہونا

بادلوں اور ہواؤں میں اڑا پھرتا میں

کاش ہوتا مری تقدیر میں طائر ہونا

کام نکلا ہے کچھ اتنا ہی یہ پیچیدہ ظفرؔ

جتنا آساں نظر آیا مجھے شاعر ہونا

kabhi awwal nazar ana kabhi akhir hona

aur waqfon se mira ghaib-o-hazir hona

main kisi aur zamane ke liye hun shayad

is zamane mein hai mushkil mira zahir hona

main na hone pe hi khush tha magar aise hua phir

mujh ko nachar para ap ki khatir hona

dur ho jaun bhi is bagh badan se lekin

kahin mumkin hi nahin aise manazir hona

waqai tum ko dikhai hi nahin deta hun

ya zarurat hai tumhari mira munkir hona

rasta ap banana hi koi sahl nahin

phir isi raste ka ap musafir hona

wo maqamat muqaddas wo tire gumbad-o-qaus

aur mira aise nishanat ka zair hona

badalon aur hawaon mein ura phirta main

kash hota miri taqdir mein tair hona

kam nikla hai kuchh itna hi ye pechida zafar

jitna asan nazar aya mujhe shayar hona