بھول بیٹھا تھا مگر یاد بھی خود میں نے کیا

بھول بیٹھا تھا مگر یاد بھی خود میں نے کیا

وہ محبت جسے برباد بھی خود میں نے کیا

نوچ کر پھینک دیے آپ ہی خواب آنکھوں سے

اس دبی شاد کو ناشاد بھی خود میں نے کیا

جال پھیلائے تھے جس کے لیے چاروں جانب

اس گرفتار کو آزاد بھی خود میں نے کیا

کام تیرا تھا مگر مارے مروت کے اسے

تجھ سے پہلے بھی ترے بعد بھی خود میں نے کیا

شہر میں کیوں مری پہچان ہی باقی نہ رہی

اس خرابے کو تو آباد بھی خود میں نے کیا

ہر نیا ذائقہ چھوڑا ہے جو اوروں کے لیے

پہلے اپنے لیے ایجاد بھی خود میں نے کیا

انکساری میں مرا حکم بھی جاری تھا ظفرؔ

عرض کرتے ہوئے ارشاد بھی خود میں نے کیا

bhul baitha tha magar yad bhi khud main ne kiya

wo mohabbat jise barbad bhi khud main ne kiya

noch kar phenk diye ap hi khwab ankhon se

is dabi shad ko nashad bhi khud main ne kiya

jal phailae the jis ke liye charon janib

is giraftar ko azad bhi khud main ne kiya

kam tera tha magar mare murawwat ke use

tujh se pahle bhi tire baad bhi khud main ne kiya

shahr mein kyun miri pahchan hi baqi na rahi

is kharabe ko to abad bhi khud main ne kiya

har naya zaiqa chhora hai jo auron ke liye

pahle apne liye ijad bhi khud main ne kiya

inkisari mein mira hukm bhi jari tha zafar

arz karte hue irshad bhi khud main ne kiya