خامشی اچھی نہیں انکار ہونا چاہئے

خامشی اچھی نہیں انکار ہونا چاہئے

یہ تماشا اب سر بازار ہونا چاہئے

خواب کی تعبیر پر اصرار ہے جن کو ابھی

پہلے ان کو خواب سے بیدار ہونا چاہئے

ڈوب کر مرنا بھی اسلوب محبت ہو تو ہو

وہ جو دریا ہے تو اس کو پار ہونا چاہئے

اب وہی کرنے لگے دیدار سے آگے کی بات

جو کبھی کہتے تھے بس دیدار ہونا چاہئے

بات پوری ہے ادھوری چاہئے اے جان جاں

کام آساں ہے اسے دشوار ہونا چاہئے

دوستی کے نام پر کیجے نہ کیونکر دشمنی

کچھ نہ کچھ آخر طریق کار ہونا چاہئے

جھوٹ بولا ہے تو قائم بھی رہو اس پر ظفرؔ

آدمی کو صاحب کردار ہونا چاہئے

khamushi achchhi nahin inkar hona chahiye

ye tamasha ab sar-e-bazar hona chahiye

khwab ki taabir par israr hai jin ko abhi

pahle un ko khwab se bedar hona chahiye

dub kar marna bhi uslub-e-mohabbat ho to ho

wo jo dariya hai to us ko par hona chahiye

ab wahi karne lage didar se age ki bat

jo kabhi kahte the bas didar hona chahiye

bat puri hai adhuri chahiye ai jan-e-jan

kam asan hai use dushwar hona chahiye

dosti ke nam par kije na kyunkar dushmani

kuchh na kuchh akhir tariq-e-kar hona chahiye

jhut bola hai to qaim bhi raho us par zafar

admi ko sahab-e-kirdar hona chahiye