جب خیمہ زنو! زور ہواؤں کا گھٹے گا

جب خیمہ زنو! زور ہواؤں کا گھٹے گا

خوں میری ہتھیلی کا طنابوں پہ ملے گا

ہو پیاس تو خود اپنے ہی ہونٹوں کا لہو چوس

سوکھی ہوئی جھیلوں میں تجھے کچھ نہ ملے گا

جلتے ہوئے رستوں کے لیے دیکھ لیا کر

کھڑکی نہ کھلے گی تو دھواں اور گھٹے گا

بستی میں غریبوں کی جہاں آگ لگی تھی

سنتے ہیں وہاں ایک نیا شہر بسے گا

پیڑوں کی اگر نسل کشی ختم نہیں کی

کچھ دن میں یہاں پیڑوں کا سایہ بھی بکے گا

بس آگ ابل سکتی ہیں یہ مردہ زمینیں

بے کار سی کوشش ہے یہاں کچھ نہ اگے گا

وہ مردہ دلی شام سے پہلے کی ادا تھی

اس وقت تو کیفیؔ کسی مقتل میں ملے گا

jab khema zano! zor hawaon ka ghatega

khun meri hatheli ka tanabon pe milega

ho pyas to khud apne hi honton ka lahu chus

sukhi hui jhilon mein tujhe kuchh na milega

jalte hue raston ke liye dekh liya kar

khirki na khulegi to dhuan aur ghatega

basti mein gharibon ki jahan ag lagi thi

sunte hain wahan ek naya shahr basega

peron ki agar nasl kashi khatm nahin ki

kuchh din mein yahan peron ka saya bhi bikega

bas ag ubal sakti hain ye murda zaminen

be kar si koshish hai yahan kuchh na ugega

wo murda dili sham se pahle ki ada thi

is waqt to kaifi kisi maqtal mein milega