عجیب ہم ہیں سبب کے بغیر چاہتے ہیں

عجیب ہم ہیں سبب کے بغیر چاہتے ہیں

تمہیں تمہاری طلب کے بغیر چاہتے ہیں

فقیر وہ ہیں جو اللہ تیرے بندوں کو

ہر امتیاز نسب کے بغیر چاہتے ہیں

مزا تو یہ ہے انہیں بھی نوازتا ہے رب

جو اس جہان کو رب کے بغیر چاہتے ہیں

نہیں ہے کھیل کوئی ان سے گفتگو کرنا

سخن وہ جنبش لب کے بغیر چاہتے ہیں

ٹھٹھرتی رات میں چادر بھی جن کے پاس نہیں

وہ دن نکالنا شب کے بغیر چاہتے ہیں

جمی ہے گرد سیاست کی جن کے ذہنوں پر

مشاعرہ بھی ادب کے بغیر چاہتے ہیں

ہے اعتماد انہیں خود پر غرور کی حد تک

اکیلے جینا جو سب کے بغیر چاہتے ہیں

ajib ham hain sabab ke baghair chahte hain

tumhen tumhari talab ke baghair chahte hain

faqir wo hain jo allah tere bandon ko

har imtiyaz nasab ke baghair chahte hain

maza to ye hai unhen bhi nawazta hai rab

jo is jahan ko rab ke baghair chahte hain

nahin hai khel koi un se guftugu karna

sukhan wo jumbish-e-lab ke baghair chahte hain

thitharti rat mein chadar bhi jin ke pas nahin

wo din nikalna shab ke baghair chahte hain

jami hai gard siyasat ki jin ke zehnon par

mushaara bhi adab ke baghair chahte hain

hai etimad unhen khud par ghurur ki had tak

akele jina jo sab ke baghair chahte hain