کیسے مانوں کہ زمانے کی خبر رکھتی ہے

کیسے مانوں کہ زمانے کی خبر رکھتی ہے

گردش وقت تو بس مجھ پہ نظر رکھتی ہے

میرے پیروں کی تھکن روٹھ نہ جانا مجھ سے

ایک تو ہی تو مرا راز سفر رکھتی ہے

دھوپ مجھ کو جو لیے پھرتی ہے سائے سائے

ہے تو آوارہ مگر ذہن میں گھر رکھتی ہے

دوستی تیرے درختوں میں ہوائیں بھی نہیں

دشمنی اپنے درختوں میں ثمر رکھتی ہے

جانے کیا سوچ کے رو لیتا ہوں اس وقت فرازؔ

زندگی جب مرے آغوش میں سر رکھتی ہے