جب بھی ٹوٹا مرے خوابوں کا حسیں تاج محل

جب بھی ٹوٹا مرے خوابوں کا حسیں تاج محل

میں نے گھبرا کے کہی میرؔ کے لہجے میں غزل

خیر مقدم کو ترے آئے گا خود ہی سورج

تو کبھی رات کی دہلیز سے باہر تو نکل

اپنے افسانے سے دلچسپیاں کچھ کم کر دے

نیند کے بوجھ سے ہونے لگیں پلکیں بوجھل

حادثے راہ کے زیور ہیں مسافر کے لیے

ایک ٹھوکر جو لگی ہے تو ارادہ نہ بدل

بولنے کے لیے چاہا ہے مجھے اس نے فرازؔ

بند ہونے کے لیے کھلتے ہیں پانی میں کنول

jab bhi tuta mire khwabon ka hasin taj mahal

main ne ghabra ke kahi mir ke lahje mein ghazal

khair maqdam ko tire aega khud hi suraj

tu kabhi rat ki dahliz se bahar to nikal

apne afsane se dilchaspiyan kuchh kam kar de

nind ke bojh se hone lagen palken bojhal

hadse rah ke zewar hain musafir ke liye

ek thokar jo lagi hai to irada na badal

bolne ke liye chaha hai mujhe us ne faraz

band hone ke liye khulte hain pani mein kanwal