وہ حشر خیز عنایات پر اتر آیا

وہ حشر خیز عنایات پر اتر آیا

بلا کا رنگ ہے اور رات پر اتر آیا

میں خود اداس کھڑا تھا کٹے درخت کے پاس

پرندہ اڑ کے مرے ہاتھ پر اتر آیا

وہ مجھ سے توڑنے والا ہے پھر کوئی وعدہ

وہ پھر سیاسی بیانات پر اتر آیا

تری جو بات مرے دل کو ہاتھ ڈالتی ہے

میں کیوں گھما کے اسی بات پر اتر آیا

خدا کہاں ہے بس اتنا سوال تھا میرا

خدا کا بندہ مری ذات پر اتر آیا

وہ پہلے پہل تو مجھ سے ہی پیار کرتا تھا

پھر اس کے بعد کمالات پر اتر آیا

ذرا سی بات تھی اشکوں کو پی گیا ہوتا

غریب شخص تھا اوقات پر اتر آیا

گیا تو پھر مرے تکیے سے نوٹ نکلے ہیں

امیر ہوتے ہی خیرات پر اتر آیا

وہ لا جواب ہوا جب زبان سے خاموش

تو اس کا چہرہ سوالات پر اتر آیا

wo hashr khez inayat par utar aya

bala ka rang hai aur rat par utar aya

main khud udas khara tha kate darakht ke pas

parinda ur ke mire hath par utar aya

wo mujh se torne wala hai phir koi waada

wo phir siyasi bayanat par utar aya

tiri jo bat mire dil ko hath dalti hai

main kyun ghuma ke isi bat par utar aya

khuda kahan hai bas itna sawal tha mera

khuda ka banda miri zat par utar aya

wo pahle pahal to mujh se hi pyar karta tha

phir is ke baad kamalat par utar aya

zara si bat thi ashkon ko pi gaya hota

gharib shakhs tha auqat par utar aya

gaya to phir mire takiye se not nikle hain

amir hote hi khairat par utar aya

wo la jawab hua jab zaban se khamosh

to us ka chehra sawalat par utar aya