آپ تو بات کا اخبار بنا دیتے ہیں

آپ تو بات کا اخبار بنا دیتے ہیں

گھر کا ماحول پر اسرار بنا دیتے ہیں

بعض آنکھوں کو تکلم بھی عطا ہوتا ہے

اپنی خاموشی کو اظہار بنا دیتے ہیں

اب شکایت نہ کرو آپ نے جو درد دئے

ہم کو پینے کا روادار بنا دیتے ہیں

حسن مطلق تجھے معلوم کہاں لذت دید

آ تجھے طالب دیدار بنا دیتے ہیں

آپ کی جنبش ابرو یہ اشارے یہ کنائے

بات کو اور مزے دار بنا دیتے ہیں

ایسے احکام بھی تکوین کی ساعات میں ہیں

جو فرشتوں کو خطا کار بنا دیتے ہیں

ہم بھی آذر ہیں اگر آپ ہیں پتھر کی چٹان

آئیے آپ کو شہکار بنا دیتے ہیں

میں کہاں تم سے ملا رات کہاں چاندنی تھی

یوں ہی بس بات مرے یار بنا دیتے ہیں

دیکھ کر لوح لحد دل میں خیال آتا ہے

سر بناتے نہیں دستار بنا دیتے ہیں

ہم نے دیکھا ہے کرشمہ یہ ترے آہن گر

پل میں زنجیر کو تلوار بنا دیتے ہیں

ap to bat ka akhbar bana dete hain

ghar ka mahaul pur asrar bana dete hain

baaz ankhon ko takallum bhi ata hota hai

apni khamoshi ko izhar bana dete hain

ab shikayat na karo ap ne jo dard diye

ham ko pine ka rawadar bana dete hain

husn-e-mutlaq tujhe maalum kahan lazzat-e-did

a tujhe talib-e-didar bana dete hain

ap ki jumbish-e-abru ye ishare ye kannae

bat ko aur maze dar bana dete hain

aise ahkam bhi takwin ki saat mein hain

jo farishton ko khata kar bana dete hain

ham bhi azar hain agar ap hain patthar ki chatan

aiye ap ko shahkar bana dete hain

main kahan tum se mila rat kahan chandni thi

yun hi bas bat mire yar bana dete hain

dekh kar lauh-e-lahad dil mein khayal ata hai

sar banate nahin dastar bana dete hain

ham ne dekha hai karishma ye tire ahan gar

pal mein zanjir ko talwar bana dete hain