زمانہ آنکھ سے اوجھل مکان سامنے ہے

زمانہ آنکھ سے اوجھل مکان سامنے ہے

چھپی ہوئی ہے حقیقت گمان سامنے ہے

نگاہ الجھی ہوئی ہے وہیں مگر دل کے

کھلی زمین کھلا آسمان سامنے ہے

کھڑا ہے تان کے وہ ابروؤں کی شمشیریں

ادھر یہ جان مری ناتوان سامنے ہے

کروں گا روزے کا اظہار کس طرح تم پر

نماز کا تو جبیں پر نشان سامنے ہے

جھکاؤں سر تو زمیں کھینچتی ہے سوئے پتال

اٹھاؤں سر کو تو سارا جہان سامنے ہے

رکا ہوا وہ کوئی کاروان سامنے ہے

وہ چل کے ٹھہر گیا ہے چٹان سامنے ہے

مرے وجود کو جنبش کا اختیار نہیں

تمہاری آنکھوں کا آئینہ دان سامنے ہے

میں اشتہا کی اذیت میں ہوں نہ کھینچ مجھے

ابھی ہے طور بہت دور نان سامنے ہے

zamana ankh se ojhal makan samne hai

chhupi hui hai haqiqat guman samne hai

nigah uljhi hui hai wahin magar dil ke

khuli zamin khula asman samne hai

khara hai tan ke wo abruon ki shamshiren

idhar ye jan miri natawan samne hai

karunga roze ka izhar kis tarah tum par

namaz ka to jabin par nishan samne hai

jhukaun sar to zamin khinchti hai su-e-patal

uthaun sar ko to sara jahan samne hai

ruka hua wo koi karwan samne hai

wo chal ke thahar gaya hai chatan samne hai

mire wajud ko jumbish ka ikhtiyar nahin

tumhari ankhon ka aina dan samne hai

main ishtiha ki aziyyat mein hun na khinch mujhe

abhi hai tur bahut dur nan samne hai