میں اپنے عشق میں پیہم زوال دیکھتا ہوں

میں اپنے عشق میں پیہم زوال دیکھتا ہوں

جو تیرے چاہنے والوں کا حال دیکھتا ہوں

میں اس لیے بھی نہیں دیکھتا ہوں آئینہ

وہاں جو چہرہ ہے اس پر جلال دیکھتا ہوں

بدل گئی ہے سماعت مری بصارت سے

میں خواب سنتا ہوں لیکن خیال دیکھتا ہوں

کہا ہے تو نے کہ تیری مثال کوئی نہیں

مگر میں نور میں تیری مثال دیکھتا ہوں

میں چاہتا ہوں کہ خود خاک پر اتر آؤں

جب آسماں سے زمیں کا جمال دیکھتا ہوں

ہزار وسوسے دل میں ابھرنے لگتے ہیں جب

کسی غریب کے شانے پہ شال دیکھتا ہوں

میں ہونٹ دیکھتا ہوں پھول دیکھنے کے بعد

تو تیرے دست ہنر کا کمال دیکھتا ہوں

پھر اس کے بعد کوئی بات کر نہیں پاتا

جب اس فقیر کی آنکھوں کو لال دیکھتا ہوں

بصد خلوص نصیحت کو سنتا رہتا ہوں

پھر اپنے ہاتھ سے میں اپنا گال دیکھتا ہوں

جو درد سہتے ہیں لیکن خموش رہتے ہیں

اب ایسے لوگ بڑے خال خال دیکھتا ہوں

main apne ishq mein paiham zawal dekhta hun

jo tere chahne walon ka hal dekhta hun

main is liye bhi nahin dekhta hun aina

wahan jo chehra hai us pur jalal dekhta hun

badal gai hai samaat miri basarat se

main khwab sunta hun lekin khayal dekhta hun

kaha hai tu ne ke teri misal koi nahin

magar main nur mein teri misal dekhta hun

main chahta hun ke khud khak par utar aun

jab asman se zamin ka jamal dekhta hun

hazar waswase dil mein ubharne lagte hain jab

kisi gharib ke shane pe shal dekhta hun

main hont dekhta hun phul dekhne ke baad

to tere dast-e-hunar ka kamal dekhta hun

phir is ke baad koi bat kar nahin pata

jab is faqir ki ankhon ko lal dekhta hun

basad khulus-e-nasihat ko sunta rahta hun

phir apne hath se main apna gal dekhta hun

jo dard sahte hain lekin khamosh rahte hain

ab aise log bare khal khal dekhta hun