ہم ایسے لوگ شیشے میں اتر جاتے ہیں دل دارا

ہم ایسے لوگ شیشے میں اتر جاتے ہیں دل دارا

چھنک کر ٹوٹ جاتے ہیں بکھر جاتے ہیں دل دارا

ہرا رہتا ہے دنیا میں ہر اک پودا محبت کا

جہاں تک شاخ جاتی ہے ثمر جاتے ہیں دل دارا

ہمارے دل کی چنگاری کو بس اک پھونک کافی ہے

زیادہ سانس لے کوئی تو ڈر جاتے ہیں دل دارا

بہت دن کہہ لیا ہم تم پہ مرتے تم پہ مرتے ہیں

بس اب کی بار یوں کرتے ہیں مر جاتے ہیں دل دارا

ہم اپنے چوکھٹے میں ہی کھڑے رہتے ہیں بے جنبش

ہمارے پاؤں سے رستے گزر جاتے ہیں دل دارا

جڑیں مضبوط رکھنے سے غرض ہے اپنے پودوں کو

یہ سر کٹوائیں تو الٹا سنور جاتے ہیں دل دارا

وہاں تک جستجو بے منت امید جاتی ہے

جہاں تک ساتھ سڑکوں کے شجر جاتے ہیں دل دار

بس اب کچھ اور تو لینا نہیں بازار دنیا سے

دکانیں بند ہونے کو ہیں گھر جاتے ہیں دل دارا

ham aise log shishe mein utar jate hain dil dara

chhanak kar tut jate hain bikhar jate hain dil dara

hara rahta hai duniya mein har ik pauda mohabbat ka

jahan tak shakh jati hai samar jate hain dil dara

hamare dil ki chingari ko bas ik phunk kafi hai

ziyada sans le koi to dar jate hain dil dara

bahut din kah liya ham tum pe marte tum pe marte hain

bas ab ki bar yun karte hain mar jate hain dil dara

ham apne chaukhte mein hi khare rahte hain be jumbish

hamare paon se raste guzar jate hain dil dara

juren mazbut rakhne se gharaz hai apne paudon ko

ye sar katwaen to ulta sanwar jate hain dil dara

wahan tak justuju be minnat-e-ummid jati hai

jahan tak sath sarkon ke shajar jate hain dil dar

bas ab kuchh aur to lena nahin bazar duniya se

dukanen band hone ko hain ghar jate hain dil dara